ఆమాస రేయి
అడవిలో నెత్తుటివాన కురుస్తున్న వేళ ..
ఆమె ..
తెగినపేగుల్ని ముడేసుకొనీ
జల్లెళ్లయిన ఒరిగిన వీరుల దేహాల్లోంచి
చిమ్ముతున్న నెత్తుటిదారను
కడవలకెత్తుకొనీ .. వాగులో కలుపుతోంది !
వాగు ..
ఎరుపెక్కిన ఆకాశంలా .. !
ఆమె ..
రాలిపోయిన పొద్దులకు
చీకటివాగులో చితిమంటల స్నానం జేసీ
ఆరిపోయిన చితిని చేటకెత్తి
విత్తులు వెదజల్లినట్టు
పిడికిళ్లతో కాటిబుగ్గిని పొల్లాల్లో వెదజల్లుతోంది !
పోడు ..
పోరువంతమైన ఆకుబట్టలా .. !
'ఎవరమ్మా వీళ్లంతా ..'
దగ్ధకంఠంతో ఆమెనడిగాను దుఃఖపుదారిలో ..!
'యీ దేశపు నుదుటాకాశం మీంచి
రాలిపోయిన కుంకుమ పొద్ధులు ..
పేగుతెగిన తల్లుల కడుపుకోతలు ' అందామె
ఓ శోకదేవతలా నడచిపోతూ ..!!
Related
