తిరోగమనం వైపు

నాడు పేలిన తుపాకీ 
నేడు విసిరేయబడ్డ చెప్పు 
వెనుక సనాతన మౌఢ్యం 

తుపాకీ వెనుక ఉన్మాదం లో మతం 
చెప్పు వెనుక కులం 
అదే వ్యక్తి అదే కుర్చీ లో ఆధిపత్య కుల వ్యక్తి వుంటే విసరగలడా?!

సాంఘిక అసమానతలను పెంచి పోషించే సనాతనం 
అక్షరం అత్యున్నత స్థాయికి చేర్చినా సహించదు 

విసిరింది వ్యక్తి 
విస్ఫోటనం సంఘంలో 
ఖజురహో కాలానికి ఇప్పుడు తీర్పు కోరే మతిభ్రమణం 
విగ్రహాల వెనుక తవ్వే కొద్దీ సత్యాలు బయటపడుతున్నాయి 
అయినా తీర్పులు సంఖ్యా బలం వైపే మొగ్గు 

తుపాకీ వ్యక్తి నిర్మూలన వైపు 
చెప్పు సంఘ లోపాల పై విహారం 
ఏది ధర్మం?! ఏది న్యాయం?! విచక్షణ లేమి 
దూసుకుపోయే బులెట్ తుపాకీలో 
వివక్ష సుస్పష్టం విసిరిన చెప్పులో 

నిరసన జ్వాలలు ఒక్కసారిగా పాలపొంగులా లేచి చల్లారాయి 
సనాతనం సందుల్లో గొందుల్లో జొచ్చుకుపోయి మనిషిని ఆలోచించనీయట్లేదు 
సాంకేతికత పురాణ పుక్కిట్లో వికసించట్లేదు 
కులం మతం చుట్టూ తిప్పుతూ ఫాసిజం పెట్టుబడి చెట్టాపట్టాలేసుకుని తిరుగుతున్నాయ్!
మనిషి బక్కచిక్కి తిరోగమనం వైపు!!