దేశానికి ఏం కావాలి

ఈ దేశానికో కండ్లు కావాలి
రాజ్యం చేస్తున్న కుట్రలను ధిక్కరించడానికి 
న్యాయాన్ని బహిరంగంగా 
బజారులో అమ్మేసుకుంటున్నందుకు 
దేశానికో కండ్లు కావాలి

ఈ రాజ్యానికి బలమైన గొంతుక కావాలి 
గొంతెత్తి గర్జించే గళాలేన్నో మూగబోయినందుకు 
ఫాసిస్టు పాలకుల పాలనలో 
బందీలుగా నలిగిపోతున్నందుకు 
రాజ్యానికి బలమైన గొంతుక కావాలి
 
ఈ దేశానికి పిడికిలి కావాలి 
అన్యాయపు అంగట్లో 
ఆదివాసి కాళ్ళ కింద నేలను 
తాకట్టు పెడుతున్నందుకు 
కార్పొరేట్లపై పిడికిలెత్తి నినదించేందుకు
దేశానికో పిడికిలి కావాలి 

ఈ దేశానికో రంగు కావాలి 
కాషాయపు కాగితాల కింద 
నలిగిపోతున్న జెండాను కాపాడేందుకు 
గాయపడిన పావురపు రంగు కావాలి
 
దోపిడి దొంగలను తరమడానికి 
పిడికిలెత్తి నినదిస్తూ 
గొంతు ఎత్తి గర్జిస్తూ
ఈ దేశాన్ని కాపాడుకునేందుకు 
ముందుగా మనం మనుషులం కావాలి.